विभिन्न भागमा चट्याङ र हावाहुरीसहित वर्षा

काठमाडौं - नेपालको विभिन्न तीन वटा प्रदेशको पूर्वतिरको भूभागमा आइतबार (आज) पूर्ण रुपमा बदली भई मेघ गर्जनसहित वर्षा हुने भएको छ ।

काठमाडौं उपत्यकालगायत विभिन्न क्षेत्रमा वर्षा हुन थालेको छ । काठमाडौं उपत्यका र पोखरा आसपासका क्षेत्रमा अहिले हावाहुरीसहित हल्का वर्षा हुन थालेको मौसमविद् बरुण पौडेलले जानकारी दिए । साँझतिर भने चट्याङ पर्ने संभावना रहेको उनले बताए ।

गण्डकी प्रदेश, प्रदेश ५ अधिकांश भूभाग र कर्णाली प्रदेशका पूर्वी भागमा पूर्ण रुपमा बदली भई मेघगर्जन, चट्याङ र हावाहुरीसहितको वर्षा गराउने बादल विकसित भएर पूर्वतिर सर्दै गएको मौसम पूर्वानुमान महाशाखाले जनाएको छ ।

जल तथा मौसम विज्ञान विभागले त्यस क्षेत्रमा बस्नेलाई सतर्कता अपनाउन आग्रह गरेको छ । सामाजिक सञ्जालमार्फत पनि विभिन्न क्षेत्रको मौसमी विवरण अपडेट गर्दै सावधानी अपनाउन पनि आग्रह गर्ने गरेको छ ।