वीरगञ्जमा आज थपिएका १७ जना कोरोना संक्रमित एकै परिवारका

काठमाडौं - बुधबार वीरगञ्जमा थपिएका १७ जना कोरोना भाइरस (कोभिड १९) संक्रमित एउटै परिवारका सदस्य रहेको खुलेको छ ।

आइतबार कोरोना संक्रमण पुष्टि भएका वीरगञ्ज महानगरपालिका-३ छपकैयास्थित ३६ वर्षीय पुरुषको १७ जना सदस्यीय परिवारमा कोरोना संक्रमण देखिएको हो । उक्त पुरुषका परिवार र सम्पर्कमा आएकाहरूको परीक्षण गर्न काठमाडौं पठाइएको थियो । त्यसक्रममा उनको परिवारका सबै सदस्यको रिपोर्ट पोजेटिभ आएको नारायणी अस्पतालका मेडिकल सुपरिटेन्डेन्ट डा. मदन उपाध्यायले जानकारी दिए ।

आज देखिएका १७ जना संक्रमितमध्ये दुई महिने नाबालक पनि छन् । याेसँगै नेपालमा संक्रमितको संख्या ९९ पुगेको छ । जसमा २२ जना निको भएकाेमा तीन जनामा पुनः संक्रमण देखिएको छ । बाँकी मुलुका विभिन्न अस्पतालमा उपचाररत छन् ।