पुस ५ देखि राम्ररी निदाउन सकिएको थिएन, अब निदाउन थालियो : बाबुराम भट्टराई

काठमाडौं - जनता समाजवादी पार्टी (जसपा)का संघिय परिषद् अध्यक्ष डा. बाबुराम भट्टराईले केपी शर्मा ओली प्रधानमन्त्रीबाट पदमुक्त भए पनि ओलीप्रवृत्ति सबैतिर कायमै रहेको बताएका छन् । 

नवनियुक्त प्रधानमन्त्री शेरबहादुर देउवाको नेतृत्वको सरकारलाई सामाजिक सञ्जालमार्फत शुभकामना दिँदै नेता भट्टराईले अर्धज्ञान र अहंकारको घातक ककटेल हाम्रो संस्कृतिमा ओलीप्रवृत्ति हाबी रहेको बताएका हुन् । देउवा सरकारले यसविरुद्ध लड्नुपर्ने उनको भनाई छ । 

‘ओली विदा भए तर ओलीप्रवृत्ति सबैतिर कायमै छ है! अर्धज्ञान र अहंकारको घातक ककटेल हाम्रो संस्कृति! राज्यदोहन गरेर आसेपासे पोस्ने क्रोनी क्यापिटालिज्म हाम्रो अर्थतन्त्रको मूलप्रवाह! बाहिर राष्ट्रवाद भित्र गुलामी राष्ट्रिय चरित्र! नवगठित @DeubaSherbdr सरकारलाई यस विरूद्ध लड्न शुभकामना!’ उनले लेखेका छन् । 

त्यस्तै, उनले संघीय लोकतान्त्रिक गणतन्त्रको संविधान मर्छ की भन्ने चिन्ताले गत पुस ५ गतेदेखि राम्ररी निदाउन नसकिएको पनि उल्लेख गरेका छन् । अब चाँही निदाउन थालिएको भन्दै उनले सर्वोच्च अदालतका न्यायाधिशहरुलाई धन्यवादसमेत दिएका छन् । ‘गत पुस५गतेदेखि राम्ररी निदाउन सकिएको थिएन-००७साल ताकाकाBP/PLदेखि जनयुद्ध/जनआन्दोलन/मधेसविद्रोहसम्मको हाम्रो पुस्ताले लडेरल्याएको संविधानसभाले बनाएको संघीय लोकतान्त्रिक गणतन्त्रको संविधान म नमर्दै मर्छ कि भन्ने चिन्ताले!अब निदाउन थालियो!धन्यवाद श्रीमानहरू!!’ उनले भनेका छन् ।