काठमाडौंको धापासीमा छुरा प्रहार गरी एक युवकको हत्या

काठमाडौं - काठमाडौंको धापासीमा छुरा प्रहार गरी एक युवकको हत्या भएको छ ।

महानगरीय प्रहरी परिसरका प्रवक्ता प्रहरी उपरीक्षक सोमेन्द्रसिंह राठौरका अनुसार शुक्रबार बिहान स्थायी घर गोरखा भई टोखा नगरपालिका–५ धापासी बस्ने २४ वर्षीय आशिष मगरको छुरा प्रहारबाट मृत्यु भएको हो । छुरा प्रहारबाट गम्भीर घाइते भएका मगरको चिरायु अस्पतालमा उपचारको क्रममा मृत्यु भएको हो ।

मगरमाथि छुरा प्रहार गर्ने दुई जना पक्राउ परेका छन् । पक्राउ पर्नेमा दिवस अधिकारी र रवि थापा मगर रहेका छन् । घटनामा अन्यको पनि संलग्न रहेकाले खोजीकार्य जारी रहेको प्रहरीले जनाएको छ । प्रहरीले यस सम्बन्धमा थप अनुसन्धान गरिरहेको छ ।