बलात्कारको आरोपमा सिद्धबाबा आइसीयूबाटै पक्राउ

काठमाडौं - बलात्कारको आरोप लागेका सिद्धबाबा कृष्णदासजी महाराज आइसीयूबाटै पक्राउ परेका छन् ।

सिद्धबाबालाई विराटनगरस्थित विराट नर्सिङ होमको आइसीयूमा भर्ना भएको अवस्थामा सोमबार बिहान प्रहरीले पक्राउ गरेको हो ।

सुनसरीका डीएसपी विनोद शर्माका अनुसार दिउँसो पक्राउ गर्दा कृष्णदासजीका समर्थकको भीड लाग्ने र अवरोध सिर्जना हुने भएकाले बिहानै पक्राउ गरिएको हो ।

सुनसरीको चतरास्थित आफ्नै आश्रममा गत कात्तिक ४ गते बलात्कार गरेको भन्दै एक महिला अनुयायीले प्रहरीमा उजुरी दिएको सार्वजनिक भएपछि उनी गत बिहीबारबाट छाति र मुटुमा समस्या आएको भन्दै विराट नर्सिङ होममा उपचारका लागि भर्ना भएका थिए।