काठमाडौं - नेशनल हेल्थ केयरले नेपालमा नै रेम्डिसिभिर औषधिको उत्पादन तथा बिक्रीका लागि अनुमति पाएको छ । गत वैशाख ३१ गते औषधि व्यवस्था विभागबाट उत्पादनको अनुमति पाएको कम्पनीले आइतबारदेखि बजारमा बिक्रीको अनुमति पनि पाएको हो । वीरगञ्जमा कारखाना रहेको नेशनल हेल्थ केयरले रेम्डिसिभिर औषधिको उत्पादन सुरु गरिसकेको छ ।

कोरोना संक्रमितको उपचारमा प्रयोग हुने भनिएको रेम्डिसिभिर औषधिको खुद्रा मूल्य कम्पनीले प्रतिभाइल ३ हजार ५ सय रुपैयाँ तोकेको छ। यसअघि भारत तथा बंगलादेशबाट आयात गरिएको रेम्डिसिभिर नेपालमा उत्पादन भएसँगै आपूर्ति सहज हुने अपेक्षा गरिएको छ। नेशनल हेल्थ केयरद्धारा उत्पादित रेम्डिसिभिरको नाम ‘रेमसिभिर’ रहेको छ।