देशभरको तापक्रम घट्दै् गएसँगै बढ्न थाल्यो वायु प्रदूषण

काठमाडौं - हाल देशभरको तापक्रम क्रमशः घट्दै गएको छ । देशबाट मनसुन बाहिरिएसँगै काठमाडौँ उपत्यकालगायत देशका विभिन्न भागको तापक्रम क्रमशः घट्न थालेको हो ।

काठमाडौँ उपत्यकामा अहिलेको तापक्रम १६ डिग्री सेल्सियस मापन गरिएको छ । आज यहाँको अधिकतम तापक्रम २६ देखि २८ डिग्री सेल्सियसका बीच रहने जल तथा मौसम विज्ञान विभागको पूर्वानुमान छ ।

हाल देशभर पश्चिमी वायुको प्रभाव रहनुका साथै कोशी, बागमती र गण्डकी प्रदेशको पहाडी भागमा स्थानीय वायुको पनि केही प्रभाव रहेको विभागले जनाएको छ ।

कोशी, मधेश, बागमती, गण्डकी र लुम्बिनी प्रदेशका केही भागमा आंशिकदेखि साधारणतया बदली रहेको र बाँकी भागमा मौसम सफा रहेको विभागले जनाएको छ ।

यता काठमाडौँ उपत्यकामा तापक्रम घटेसँगै वायु प्रदूषण पनि बढेको छ । वायु प्रदुषण बढेसँगै काठमाडौँको वायुमण्डल धुम्मिएको छ । एअर क्वालिटी इन्डेक्स मापक अनुसार काठमाडौँ उपत्यकाको वायुको गुणस्तर १५५ छ । यसको अर्थ काठमाडौँको वायु गुणस्तर अस्वस्थकर हो ।

विश्व स्वास्थ्य संगठन (डब्ल्यूएचओ) ले एक्यूआई १५० भन्दामा माथि पुग्दा वायुलाई अस्वस्थ मान्ने गरेको छ । उक्त अंक ३ सय भन्दा माथि पुगे त्यसलाई खतरनाक मानिने गरिएको छ ।

मनसुन सकिएपछि काठमाडौं उपत्यकामा केही दिन गर्मी भए पनि केही दिन यता तापक्रम घट्दै गएको छ ।