प्रधानन्यायाधीशको प्रश्न: कुन धाराअन्तर्गतको प्रधानमन्त्रीले संसद् विघटन गर्न पाउँछ ?

काठमाडौं - प्रतिनिधि सभा विघटन सम्बन्धी रिट निवेदनमाथिको बहस आज पनि जारी छ ।

आज बहसको क्रममा प्रधानन्यायाधीश चोलेन्द्र शमशेर राणाले संसद् विघटन कुन धाराअन्तर्गतको प्रधानमन्त्रीले गर्न पाउने हो भनी प्रश्न गरेका छन्। 

रिट निवेदकतर्फका कानुन व्यवसायी वरिष्ठ अधिवक्ता चन्द्रकान्त ज्ञवालीले बहस गरिरहँदा प्रधानन्यायाधीश राणाले कुन प्रधानमन्त्रीले विघटन गर्न पाउने भनी प्रश्न गरेका हुन् । 

बहसमा ज्ञवालीले संविधानअनुसार संसद्बाट सरकार नजन्मिदासम्म संसद् विघटन नहुने तर्क गरे । राष्ट्रपति र प्रधानमन्त्रीले गम्भीर संविधान उल्लंघन गरेको उनको भनाई छ ।

‘केपी शर्मा ओली ७६(३) को प्रधानमन्त्री हो, उहाँ ७६(५) को प्रधानमन्त्री बन्नुभएकै छैन । उहाँले कसरी विघटन गर्न सक्नुहुन्छ ?’ ज्ञवालीले भने । 

त्यसपछि ज्ञवालीलाई राणाले सोधे, ‘संविधानले सरकार बन्न नसकेमा विघटन गर्न पाउने अधिकार दिएको छ। त्यो अधिकार उपधारा ५ को प्रधानमन्त्रीले मात्र पाउने हो र ? यसमा ७६ (५) पछि उपधारा ७ पनि व्याख्या गर्ला। उपधारा ५ को प्रधानमन्त्रीले विश्वासको मत प्राप्त गर्न नसके विघटन गर्न उपधारा ७ ले पाउँछ हैन र ?’