राजावादी आन्दोलमा जनपद र सशस्त्रतर्फ गरी ८० सुरक्षाकर्मी घाइते

काठमाडौं - चैत १५ गते शुक्रबार काठमाडौंको तिनकुने क्षेत्रमा राजावादीहरुले गरेको प्रदर्शनमा ८० जना सुरक्षाकर्मीहरु घाइते भएका छन् ।

प्रदर्शनका क्रममा प्रदर्शनकारी र सुरक्षाकर्मीबीच झडप हुँदा तीनकुने क्षेत्रको वातावरण अस्तव्यस्त बन्दै कर्फ्यूसम्म पनि लगाउनुपर्ने अवस्था आइपरेको थियो ।

त्यस क्रममा प्रहरीको गोली लागेर एक जनाको मृत्यु भयो भने २० जना घाइते भएका थिए । तीमध्ये एक जना २२ वर्षीया युवती अहिले पनि गम्भीर अवस्थामा राजधानीको सिभिल अस्पतालमा उपचाररत छिन् । उक्त आन्दोलनमा एक जना पत्रकारको जलेर मृत्यु भयो ।

प्रदर्शनका क्रममा प्रदर्शनकारीमात्र नभएर सुरक्षाकर्मीहरु पनि घाइते भए । त्यो दिन तीनकुने क्षेत्रमा खटिएकामध्ये नेपाल प्रहरीका ५५ जना र सशस्त्र प्रहरी बलका २५ जना गरी जम्मा ८० जना घाइते भएका छन् । घाइते हुनेमा प्रहरी जवानदेखि डिएसपीसम्म छन् । घटनामा ३ जना डिएसपी घाइते भएका थिए ।