वीर अस्पतालमा कोरोना आशंका गरिएका २ जनाको मृत्यु

काठमाडौं -  काठमाडौंस्थित वीर अस्पतालमा कोरोना भाइरस (कोभिड-१९) संक्रमणको आशंका गरिएका २ जना बिरामीको मृत्यु भएको छ । मृत्यु हुनेमा १ जना महिला र अर्का पुरुष रहेको अस्पताल स्रोतले बताएको छ ।

आइतबार भर्ना भएकी महिलाको आईसीयूमा उपचारका क्रममा सोमबार विहान मृत्यु भएको हो । काठमाडौंको चन्द्रागिरीमा बस्दै आएकी ती महिला यसअघि पनि मधुमेह, पिसाब संक्रमण र हाइपोटेन्सन लगायत रोगबाट ग्रसित रहेकी थिइन् ।

यस्तै, मृत्यु हुने पुरुष भने भारतीय नागरिक रहेको बताइएको छ । हाल काठमाडौंको कालिमाटी बस्दै आएका उनी केही दिन अगाडि मात्रै  भारतबाट नेपाल आएका थिए ।

अस्पतालका निर्देशक डा. केदार सेञ्चुरीका अनुसार दुबै जनाको कोरोना संक्रमण आशंकामा नमूना संकलन गरी परीक्षणका लागि राष्ट्रिय जनस्वास्थ्य प्रयोगशालामा नमुना पठाइएको छ । तर रिपोर्ट आइपुगेको भने छैन ।