कोरोना भाइरस: एक दिनमै ९४ जनाको मृत्यु, मर्नेहरुको कुल संख्या ११०० नाध्यो

एजेन्सी - गत वर्षको अन्त्यतिरबाट चीनमा देखिएको यो नयाँ भाइरस द्रुत रूपमा फैलिएपछि चीनको मुख्य भूमिमै ११ सय जनाभन्दा बढी मानिसको मृत्यु भएकाे छ । सोमबार प्राप्त एक समाचारअनुसार यस भाइरसबाट ११०० व्यक्तिको मृत्यु भएको छ भने ४४ हजारभन्दा बढी मानिस सङ्क्रमित छन् । 

मंगलबार प्राप्त एक समाचारअनुसार यस भाइरसको सुरुवात भएको प्रमुख स्थानको रुपमा रहेको हुबेई प्रान्तमा  आइतबारसम्म  मात्र यस भाइरसबाट २ हजार ६१८ जना सङ्क्रमित भएका बताइएको छ । मंगलबार एकै दिनमा ९४ व्यक्तिको मृत्यु भएको स्थानीय अधिकारीहरुले जानकारी दिएकका छन् ।

हुबेई प्रान्तका दुई हजार ६१८ जना सङ्क्रमितहरुमा १ हजार ९२१ जना हुबेइ प्रान्तको प्रान्तीय राजधानी अर्थात कोरोना भाइरसबाट अत्यन्त प्रभावित स्थान उहानमा मात्र रहेका छन् । आइतबार एकै दिनमा ज्यान गुमाउनेमा पनि ७३ जना उहानका नै रहेका जनाइएको छ ।