एजेन्सी - सिरि ए फुटबल अन्तर्गत ए एस रोमाले फराकिलो जित निकालेको छ । गएराति भएको खेलमा रोमाले स्पालमाथि ६–१ गोल अन्तरको जितेको हो ।

खेलको १० औँ मिनेटमा निकोला कानिनिसले गोल गर्दै रोमालाई घरेलु मैदानमा अग्रता दिलाए । तर, स्पालका अल्ब्रेटो केरीले २४ औँ मिनेटमा गोल गर्दै बराबरीको स्थितिमा ल्याए ।

३८ औँ मिनेटमा कार्लेस प्रेजाले गोल गर्दै रोमालाई २–१ गोलको अग्रता दिलाए । ४७ औँ मिनेटमा आलेक्सेन्डर कोलारोभले रोमाका लागि तेस्रो गोल गरे । ५२ औँ मिनेटमा ब्रुनो पेजले रोमाका लागि चौथो गोल गरे । पेरेजले नै खेलको ७५ औँ मिनेटमा व्यक्तिगत दोस्रो गोल गर्दै रोमाको अग्रता ५–१ गोलमा ल्याए ।

खेलको अन्तिम मिनेटमा निकोलो जानिलोले गोल गर्दा रोमाले ६–१ गोलको फराकिलो जित हात पार्यो । जितसँगै रोमाले ३५ खेलबाट ६१ अंक जोड्दै शीर्ष पाँचमा स्थान बनाएको छ । स्पाल भने रेलिगेसन जोनमा छ ।