सीपीएलमा आज पहिलो खेल खेल्दै सन्दीपको टोली

काठमाडौं - नेपाली लिग स्पिनर सन्दीप लामिछाने अनुबन्धित जमैका तलवाजले क्यारेबियन प्रिमियर लिग (सीपीएल) अन्तर्गत पहिलो खेलमा सेन्ट लुसिया जोउक्ससँग खेल्दैछ । खेल नेपाली समयानुसार ब्रायन लारा क्रिकेट एकेडेमीमा राति पौने ८ बजेदेखि सुरु हुनेछ ।

यो सिजन जमैकाले सन्दीपलाई १ करोड बढी रकममा अनुबन्ध गरेको थियो। गत सिजन राष्ट्रिय टोलीको खेलका कारण आधा मात्र खेल खेलेका सन्दीपले यो सिजन पूरै खेल्ने सम्भावना रहेको छ । यसअघिका दुवै सिजन सन्दीपले फरक–फरक टोलीबाट खेलेका थिए।

सन्दीप लामिछाने रहेको जमैका आफ्नो पहिलो खेलमा जित निकाल्दै सुखद सुरुवात गर्न चाहन्छ । सिजनको पहिलो खेलमा सन्दीपले प्लेइङ सेटमा स्थान बनाउने बलियो सम्भावना रहेको छ ।

मंगलबारबाट सुरु भएको सीपीएलमा दुई खेल भएका थिए । उद्घाटन खेलमा ट्रीनबेगो नाइट राइडर्सले विजयी सुरुवात गरेको छ । ट्रीनबेगो नाइट राइडर्सले गुयाना एमेजन वारियर्सलाई ४ विकेटले हराउँदै सुखद सुरुवात गरेको हो ।

यस्तै, दोस्रो खेलमा बार्बाडोस ट्राइडेन्ट्सले सेन्ट किट्स एण्ड नेभिस प्याट्रीओट्सलाई ६ रनले पराजित गर्दै विजयी हात पारेको थियो ।