काठमाडौ - म्यानचेस्टर सिटीलाई पराजित गर्दै आर्सनल एफए कपको फाइनलमा प्रवेश गरेको छ। शनिबार राति भएको खेलमा आर्सनलले सिटीलाई २-० गोलले पराजित गर्‍यो।

आर्सनलको जितमा पियरी इमिरेक अयुबामेयाङले दुवै गोल गरे। उनले खेलको १९ मिनेटमा पहिलो गोल गरेका थिए। निकोलास पेपेको क्रसमा उनले उत्कृष्ट गोल गरेका थिए।

अयुबामेयाङले ७१ मिनेटमा आर्सनलको अग्रता दोब्बर पारे। जितसँगै आर्सनल एफए कपको फाइनलमा २१औं पटक प्रवेश गर्न सफल भयो। जसमध्ये आर्सनलले १३ पटक उपाधि जितेको छ।

अब उपाधिका लागि आर्सनलले अगस्ट १ मा चेल्सी वा म्यानचेस्टर युनाइटेडसँग खेल्नेछ। चेल्सी र युनाइटेडबीच दोस्रो सेमिफाइनलमा आइतबार प्रतिस्पर्धा हुनेछ।