प्रिमियर लिग: चेल्सीमाथि लिभरपुलको सानदार जित

एजेन्सी - प्रिमियर लिग फुटबलमा लिभरपुलले चेल्सीमाथि सानदार जित निकालेको छ । गएराति घरेलु मैदान एनफिल्डमा भएको खेलमा लिभरपुलले चेल्सीमाथि ५–३ को जित निकालेको हो ।

रोमाञ्चक खेलमा घरेलु टोली लिभरपुलले ३–० को अग्रता बनाएको थियो । नाबी केईटाले २३ औंं मिनेटमा लिभरपुललाई अग्रता दिलाएका थिए । ट्रेन्ट अलेक्जेन्डर अर्नोल्डले ३८ औं मिनेटमा घरेलु टोलीको अग्रता दोब्बर बनाए । जर्जिनियो विजनाल्डमले ४३ औं मिनेटमा लिभरपुललाई ३–० को अवस्थामा पुर्याएका थिए ।

पहिलो हाफको अन्तिम मिनेटमा चेल्सीका ओलिभर जिराउडले गोल गर्दै चेल्सीलाई खेलमा फर्काउने कोसिस गरे । तर, ५५ औं मिनेटमा रोबर्टो फिर्मिन्होले गोल गर्दै लिभरपुललाई ४-१ को बलियो स्थितिमा पुर्याए ।

चेल्सीका टमी अब्राहमले ६१ औं मिनेटमा खेललाई ४–२ को अवस्थामा ल्याए । क्रिस्टियन पुलिसिकले ७३ औं मिनेटमा चेल्सीका लागि गोल गर्दै पाहुना टोलीलाई खेलमा फर्काउने खाजे। तर खेल सकिन ६ मिनेट अघि एलेक्स आक्सलेड चेम्बरलेनले गोल गर्दै लिभरपुललाई ५–३ को शानदार जित दिलाए ।

च्याम्पियन लिभरपुलले लिगमा एक खेल खेल्न बाँकी रहेको अवस्थामा ९६ अंक जोडेको छ । चौथो स्थानमा धकेलिएको चेल्सीको ६३ अंक छ ।