काठमाडौं - स्पेनिस क्लब सेभिल्ला युरोपा लिग फुटबलको क्वार्टरफाईनलमा प्रवेश गरेको छ ।

बिहिबार राति भएको अन्तिम १६ को खेलमा इटालियन क्लब रोमालाई २-० ले पराजित गर्दै सेभिल्लाले अन्तिम आठमा स्थान पक्का गरेको हो । सेभिल्लाको जितमा सर्जियो रिगुइलन र युस्सेफ इन न्यास्रीले गोल गरे । दुवै गोल पहिलो हाफमा सम्भव भएको थियो ।

२२ औं मिनेटमा सर्जियोले सेभिल्लालाई सुरुवाती अग्रता दिलाएका थिए । यस्तै, न्यास्रीले ४४ औं मिनेटमा दोस्रो गोल गर्दै सेभिल्लाको जित सुनिश्चित गरेका थिए ।

खेलको अन्तिम समयमा रोमा १० खेलाडीमा समेटिएको थियो । अब सेभिल्लाले अन्तिम आठमा इंग्लिस क्लब वल्भ्सको सामना गर्नेछ । वल्भ्सले ग्रीसको ओलम्पियाकोसलाई समग्रमा २–१ ले पराजित गर्दै अन्तिम आठमा मा स्थान पक्का गरेको थियो ।

यस्तै, अर्को खेलमा जर्मन क्लब बायर लिभरकुसनले स्कटिस क्लब रेन्जर्सलाई समग्रमा ४–१ ले पराजित गर्दै अन्तिम आठको यात्रा तय गरेको छ । अब लिभरकुशनले अन्तिम आठमा सिरि ए क्लब ईन्टर मिलानसंग खेल्नेछ ।