एजेन्सी - इंग्लिस प्रिमियर लिग फुटबलमा चेल्सी तेस्रो स्थानमा उक्लिएको छ । गएराति भएको खेलमा चेल्सीले क्रिस्टल प्यालेसलाई ३-२ गोल अन्तरले पराजित गर्दै तालिकाको तेस्रो स्थानमा उक्लिएको हो ।

चेल्सीको जितमा ओलिभर जेरुड, क्रिस्टियन पुलिसिच र टामी अब्राहमले एक एक गोल गरे । क्रिस्टलका विल्फ्रेड जाहा र क्रिस्टियन बेन्टेकेले एक एक गोल फर्काए ।

खेलको छैटौं मिनेटमा जेरुडले गोल गर्दै चेल्सीलाई अग्रता दिलाए । २७ औं मिनेटमा पुलिसिचले गोल गर्दा चेल्सीको अग्रता दोब्बर बनाए ।

तर, ३४ औं मिनेटमा जाहाले उत्कृष्ट गोल गर्दै क्रिस्टललाई खेलमा फर्काए । यस्तै, खेलको ७१ औं मिनेटमा अब्राहमले गोल गर्दै चेल्सीलाई ३-१ को अग्रता दिलाए । त्यसपछि खेलको ७२ औं क्रिस्टलका बेन्टेकेले एक गोल फर्काए पनि चेल्सी ३-२ गोल अन्तरले बिजयी भयो ।

जितसँगै चेल्सी लिगको तेस्रो स्थानमा उक्लिएको छ । चेल्सीले लेष्टर सिटीलाई २ अंकले पछि पार्दै चेल्सी शीर्ष तीनमा उक्लिएको हो । पराजित क्रिस्टल ४२ अंक जोडेर १४ औं स्थानमा रहेको छ ।