म्यान्यु पाँचौ स्थानमा उक्लियो

काठमाडौं - म्यानचेस्टर युनाइटेड इन्ग्लिश प्रिमियर लिगको पाँचौं स्थानमा उक्लिएको छ । आइतवार भएको खेलमा वाट्फोर्डलाई ३–० गोल अन्तरले हराउँदै युनाइटेड शीर्ष पाँचमा उक्लिएको हो ।

घरेलु मैदानमा युनाइटेडलाई जित दिलाउन ब्रुनो फर्नान्डेज, एन्थोनी मार्शल र मासुन ग्रिनवुडले एक–एक गोल गरे ।

ओल्ड ट्राफोर्डमा ४२औं मिनेटमा फर्नान्डेजले पेनाल्टीमा गोल गर्दै युनाइटेडलाई अग्रता दिलाए । युनाइटेडका लागि उनको यो पहिलो गोल हो ।

खेलको ५८औं मिनेटमा मार्शलले गोल गर्दा युनाइटेड २–० ले अघि रह्यो । त्यसपछि खेलको ७५औं मिनेटमा ग्रिनवुडले गोल गर्दै युनाइटेडलाई ३–० को सहज जित दिलाए ।

जितसँगै युनाइटेडले २७ खेलबाट ४१ अंक जोडेको छ । रेलिगेसन क्षेत्रको वाट्फोर्डले २४ अंक जोडेको छ ।