एजेन्सी - प्रिमियर लिगमा म्यानचेष्टर युनाइटेड साउथह्याम्पटनसँग बराबरीमा रोकिएको छ । गएराति भएको खेलमा इन्जुरी टाइममा अग्रता जोगाउन नसकेपछि युनाइटेड साउथह्याम्पटनसँग २-२ को बराबरीमा रोकिएको हो ।

युनाइटेडको घरेलु मैदान ओल्ड ट्राफोर्डमा भएको खेलको १२औं मिनेटमा स्टुअर्ट आर्मस्ट्रोले गोल गर्दै साउथह्याम्पटनलाई अग्रता दिलाएका थिए । तर, त्यसको ८ मिनेटपछि मार्कुस रासफोर्डले युनाइटेडका लागि बराबरी गोल पर्काए ।

२३औं मिनेटमा एन्टोनी मार्टिएलले गोल गर्दै यनाइटेडलाई २-१ को अग्रता दिलाए । तर, इन्जुरी टाइमको छैटौं मिनेटमा साउथह्याम्पटनका माइकल ओबाफेमीले गोल गरेपछि युनाइटेड बराबरीमा रोकियो ।

बराबरीसँगै युनाइटेडले तेस्रो स्थानमा उक्लने मौका गुमाएको छ । युनाइटेड बराबरीपछि ३५ खेलबाट ५९ अंक जोड्दै पाँचौ स्थानमै यथावत छ । साउथह्याम्पटन भने ३५ खेलबाट ४५ अंक जोड्दै १२औं स्थानमा छ ।