लिसीमाथि युभेन्टसको सहज जित, ७ अंकको अग्रता

एजेन्सी - इटालियन सिरि ए फुटबलमा युभेन्टसले सहज जित निकालेको छ । गएराति भएको खेलमा युभेन्ट्सले लिसीलाई ४–० गोल अन्तरले हराएको हो ।

युभेन्टसको जितमा पाउलो डिबाला, क्रिस्टियानो रोनाल्डो, गोन्जालो हिग्विन र म्याथिज डी लिटले गोल गरे ।सहज जितपछि ६७ अंक जोडेको युभन्ट्सले दोस्रो स्थानको लाजियोमाथि ७ अंकको अग्रता राख्दै उपाधि होड बलियो बनाएको छ ।

लिसी २५ अंक सहित रेलिगेशन जोनमा छ ।

खेलको पहिलो हाफ बराबरीमा रोकिएको थियो । डिबालाले ५३ औं मिनेटमा गोल गर्दै सूरुवाती अग्रता दिलाए । रोनाल्डोले ६२औं मिनेटमा पेनाल्टीमा गोल गर्दै अग्रता दोब्बर पारे । हिग्वेनले ८३औं मिनेटमा युभेन्ट्सका लागि तेस्रो गोल गरे । डे लिटले ८५औं मिनेटमा हेडमार्फत् गोल गरेपछि युभेन्ट्सले सहज जित हात पारेको हो । रोनाल्डोले यस सिजनको लिगको २४ खेलमा २३ गोल गरेका छन् ।