काठमाडौं - नेपाल प्रिमियर लिग (एनपिएल) क्रिकेटमा आज सुदुरपश्चिम रोयल्स र कर्णाली याक्स भिड्दैछन । समुह चरणको यो अन्तिम खेलले प्ले–अफ्मा पुर्‍याउने चौथो टोलीको टुंगो लगाउनेछ ।

अहिलेसम्म सुदुरपश्चिमसँगै जनकपुर बोल्ट्स र चितवन राइनोज प्ले–अफ्मा पुगिसकेका छन् । आजको खेलपछि कर्णाली याक्स र काठमाडौ गुर्खाजमध्येको एक टोली प्ले–अफ्मा पुग्नेछ ।

आज सुदुरपश्चिमले कर्णालीलाई फराकिलो अन्तरमा हराएको खण्डमा काठमाडौं प्लेअफ्मा पुग्नेछ । अन्यथा कर्णालीकै संभावना बलियो छ ।

लिगमा ६ खेलबाट सुदुरपश्चिमले १० अंक जोडेको छ भने जनकपुरले ७ खेलबाट १० अंक जोडेको छ । चितवन, कर्णाली र काठमाडौंको समान ८–८ अंक छ ।

लिग चरणको शीर्ष दुई स्थानमा रहने टोलीले फाइनल प्रवेशको लागि क्वालिफायर खेल्नेछन् । यो खेलको विजेता फाइनलमा पुग्नेछ भने पराजित हुने टोलीले तेस्रो र चौथो स्थानमा रहने टोलीबिचको विजेतासँग दोस्रो क्वालिफायर खेल्ने मौका पाउनेछ ।

एनपिएल क्रिकेटको क्वालिफायर बुधवारदेखि हुनेछ भने फाइनल खेल आगामी शनिवार हुनेछ ।